भुसावळ | प्रतिनिधी
भुसावळ शहरातील प्रोफेसर कॉलनी भागात वादग्रस्त ठरलेल्या ‘संतोषी माता बहुउद्देशीय सभागृह’ बाबत अखेर न्यायालयाने महत्त्वाचा निर्णय दिला आहे. या सभागृहाचा ताबा तात्काळ प्रशासनाकडे देण्याचे आदेश देण्यात आले असून, त्यानुसार सोमवार, २ फेब्रुवारी रोजी प्रशासनाने कायदेशीर कारवाई करत सभागृहाचा ताबा आपल्या अखत्यारीत घेतला आहे.
शासनाची मान्यता नसताना तसेच मूळ उद्देशाला हरताळ फासून संबंधित जागेचे हस्तांतर करण्यात आल्याचा आरोप करत या प्रकरणी Bombay High Court येथे याचिका दाखल करण्यात आली होती. या याचिकेवर सुनावणी करत न्यायालयाने सदर सभागृहाचा ताबा तात्काळ Bhusawal Municipal Council यांच्याकडे देण्याचे स्पष्ट आदेश दिले.
न्यायालयाच्या आदेशानुसार प्रशासनाने तातडीने हालचाली करत सभागृहाचा ताबा घेतला असून, पुढील कारवाई कायदेशीर प्रक्रियेनुसार केली जाणार असल्याची माहिती प्रशासनाकडून देण्यात आली आहे. या निर्णयामुळे शहरात चर्चेचा विषय ठरलेल्या या सभागृहाच्या प्रकरणाला नवे वळण मिळाले आहे.
