📰 बातमी
घरफोडीचा प्रयत्न; नागरिकांच्या सतर्कतेमुळे आरोपीस चोप

भुसावळ (प्रतिनिधी):
भुसावळ शहरातील चिकुच्या मळा, रूपमिलन नगर परिसरात घरफोडीचा प्रयत्न करणाऱ्या एका संशयित आरोपीस स्थानिक नागरिकांनी पकडून चोप दिल्याची घटना घडली. ही घटना रात्रौ धार्मिक कार्यक्रम सुरू असताना घडली.

मिळालेल्या माहितीनुसार, भुसावळ येथे धार्मिक कार्यक्रम सुरू असताना घरातील सदस्य कार्यक्रमासाठी बाहेर गेले होते. याच संधीचा फायदा घेत अज्ञात इसमाने घराच्या मागील दरवाजाला जोरदार धक्का देत आत प्रवेश करण्याचा प्रयत्न केला.  घरातील महिलांनी आरडाओरड केली.

महिलांच्या आवाजाने परिसरातील नागरिक घटनास्थळी धावून आले. नागरिकांनी आरोपीस पकडण्याचा प्रयत्न केला असता त्याने सुरीने हल्ला करण्याचा प्रयत्न केला. मात्र नागरिकांनी सतर्कता दाखवत त्याला पकडून चोप दिला

घटनेची माहिती मिळताच बाजारपेठ पोलीस ठाण्याचे कर्मचारी घटनास्थळी दाखल झाले. जखमी आरोपीस उपचारासाठी ट्रामा केअर सेंटर येथे दाखल करण्यात आले आहे. या प्रकरणी बाजारपेठ पोलीस ठाण्यात गुन्हा दाखल करण्याची प्रक्रिया सुरू असून पुढील तपास सुरू आहे.