बातमी (News Content):
भुसावळ : नगराध्यक्ष गायत्री भंगाळे यांच्या वाहनावर प्रशासनाने कारवाई करत ते ताब्यात घेतल्याची घटना समोर आली आहे. जात पडताळणी प्रक्रियेत सादर केलेल्या प्रमाणपत्राबाबत आक्षेप नोंदवल्यानंतर ही कारवाई करण्यात आली असल्याचे सांगितले जात आहे.
जळगाव जात पडताळणी समितीने संबंधित प्रमाणपत्र अवैध ठरवल्यानंतर पालिका प्रशासनाने तातडीने पावले उचलली. त्यानुसार नगराध्यक्षांच्या वापरातील शासकीय वाहन जप्त करण्यात आले. या कारवाईमुळे स्थानिक राजकीय वर्तुळात मोठी खळबळ उडाली आहे.
प्रशासनाकडून रात्री उशिरा ही कारवाई करण्यात आली असून, संबंधित वाहन अग्निशमन विभागाच्या कार्यालयात जमा करण्यात आले आहे. या घटनेनंतर नगराध्यक्षांच्या पदाबाबत पुढील कायदेशीर प्रक्रिया काय होणार याकडे सर्वांचे लक्ष लागले आहे.
दरम्यान, नगराध्यक्ष गायत्री भंगाळे यांनी ही कारवाई नियमबाह्य असल्याचा दावा करत प्रशासनाच्या भूमिकेवर प्रश्नचिन्ह उपस्थित केले आहे.
